Gjykata e Korçës ka vendosur masën e sigurisë “arrest me burg” për ish drejtorin e burgut Durim Toska, i cili dhunoi pak ditë më parë bashkëshorten e tij.
Durim Toska u arrestua mbrëmjen e 2 dhjetorit në Pogradec, ndërsa gjatë kontrollit të ushtruar në banesën e tij, u gjet edhe armë zjarri me municion të cilën 52-vjecari e posedonte pa lejë.
Toska u arrestua nga policia rreth një ore pasi ministria e Drejtësisë informoi për shkarkimin e tij nga posti i Drejtorit të Institucionit të Ekzekutimit të Veprave Penale në Fushë-Krujë.
Sipas një njoftimi nga Ministria e Drejtësisë, Toska është shkarkuar nga ministri i Ulsi Manja, me propozim të drejtorit të përgjithshëm të Burgjeve, për cenimin e kritereve etike e ligjore.
“Ministri i Drejtësisë, z. Ulsi Manja, ka ndërmarë këtë hap, pas propozimit të Drejtorit të Përgjithshëm të Burgjeve, duke e bazuar vendimin në kritere etike dhe ligjore të cënuara nga z. Durim Toska. Vendimi vjen në përshtatje me objektivat e Ministrisë së Drejtësisë dhe Drejtorisë së Përgjithshme të Burgjeve për përmirësimin e efikasitetit dhe integritetit në sistemin e drejtësisë”, njofton Ministria e Drejtesisë.